پیرس۔10اگست(اے پی پی) اولمپک چیمپیئن ارشد ندیم جیولین تھرو اچ گولڈ میڈل گھنݨ تے اولمپک ریکارڈ بݨاوݨ دا تاریخی کارنامہ سر انجام ݙیوݨ دے بعد فرانس توں پاکستان روانہ تھی آئن جتھاں پوری قوم اپݨے ہیرو دا پرتپاک استقبال کرݨ دے انتظار وچ اے ۔ پاکستانی سفیر عاصم افتخار احمد ارشد ندیم کوں پیرس ہوائی اݙے تے پرتپاک انداز نال رخصت کیتے۔ فرانس اچ پاکستان سفارتخانہ دی ایکس تے پوسٹ موجب ایندے توں پہلے ارشد ندیم دی شاندار کامیابی دا جشن مناوݨ تے انھاں دے اعزاز اچ فرانس اچ پاکستان دے سفارتخانہ اچ ھک زبردست تقریب پذیرائی دا اہتمام کیتا ڳیا جیں اچ پاکستانی کمیونٹی دے ارکان جوش تے جذبے نال شرکت کیتی ۔ فرانس اچ پاکستان دے سفیر عاصم افتخار احمد اتے سفارتخانے دے حکام وی اتھاں موجود ہن ۔ پاکستانی سفارتخانہ دے ٻاہروں روایتی دول وڄا تے ارشد ندیم دا خیرمقدم کیتا ڳئے ۔ لوکاں ارشد ندیم نال تصویراں تے سیلفیاں بݨوائیاں پاکستان زندہ باد دے نعرے ماریے ۔ ہر کوئی ارشد نال ہتھ ملاوݨ تے تصویر بݨاوݨ سانڳے بے تاب نظر آئے۔ ٻال آپݨی زندگی دیاں یاداں محفوظ رکھݨ سانڳے ارشد ندیم توں آٹوگراف گھنݨ سانڳے پرجوش ہن ۔ سفیرعاصم افتخار ارشد ندیم دی تاریخی تے یادگارکامیابی تے انھاں کوں مبارخ ݙتی تے مستقبل سانڳے نیک خواہشات دا اظہار کیتے۔ انھاں تقریب دے شرکا دے رلے پاکستان زندہ باد دے پرجوش نعرے وی ماریے ۔ ارشد ندیم ریکارڈ ساز کامیابی تے اللہ تعالی دا شکر ادا کریندے ڈھیر دعائیں کرݨ تے قوم دا شکریہ ادا کیتے ۔ پاکستان سفارتخانہ دی پوسٹ وچ آکھیا ڳئے ارشد ندیم گولڈ میڈل نال نواں اولمپک ریکارڈ بݨاوݨ دا ناقابل یقین سفر طے کیتے اتے قوم دا سر فخر نال اُچا کیتے
