اسلام آباد۔16مارچ (اے پی پی) وزیراعظم محمد شہبازشریف وزارت خارجہ کوں ڈاکٹر عافیہ دی جلد رہائی کیتے امریکی حکومت نال رابطے اچ رہݨ دی ہدایت کیتی اے۔ خمیس کوں وزیراعظم آفس دے میڈیا ونگ توں جاری بیان دے مطابق وزیر اعظم محمد شہبازشریف نال ڈاکٹر عافیہ صدیقی دی ٻھیݨ ڈاکٹر فوزیہ صدیقی ملاقات کیتی۔ انہاں وزیراعظم دا شکریہ ادا کریندیں ہوئیں حکومت ولوں ڈاکٹر عافیہ دی بہبود کیتے کیتے ڳے کم دی تعریف کیتی اتے درخواست کیتی جو حکومت ڈاکٹر عافیہ دی جلد رہائی کیتے اپݨی کوششاں ودھاوے۔ وزیراعظم ڈاکٹر فوزیہ صدیقی کوں حکومت پاکستان ولوں تعاون دا یقین ݙویندیں ہوئیں وزارت خارجہ کوں ڈاکٹر عافیہ دی خیریت اتے انہاں دی جلدی رہائی کیتے امریکی حکومت دے نال نال واشنگٹن اچ پاکستانی مشن نال رابطے اچ رہݨ دی ہدایت کیتی۔
