نصير آباد – 01 – سيپٽمبر (اي پي پي) صدر ڊاڪٽر عارف علوي نصيرآباد جي دوري سميت ڊيره مراد جمالي ۾ ٻوڏ متاثرين جي لاءِ قائم ريليف ڪئمپ جو دورو ڪيو. صدر کي ضلعي انتظاميا پاران ٻوڏ سبب ٿيندڙ تباهين ۽ امدادي سرگرمين بابت بريفنگ ڏني وئي. ان موقعي تي ڳالهائيندي هن چيو ته ٻوڏ بلوچستان کي وڏي پئماني تي متاثر ڪيو آهي، مشڪل جي هن گهڙيءَ ۾ بلوچستان جي ٻوڏ متاثرين کي اڪيلو نه ڇڏينداسين. عارف علوي چيو ته بلوچستان جي ٻوڏ سٽيلن جي بحالي لاءِ امدادي سرگرمين ۾ وڌيڪ تيزي آندي وڃي ۽ انهن جي جلد بحالي، گهرن جي ٻيهر تعمير ۽ نقصان جي جلد ازالي جي ضرورت آهي. هن چيو ته بلوچستان ۾ ٻوڏ متاثرين کي راشن پيڪجز جي سخت ضرورت آهي، سرندي وارا، فلاحي ادارا، حڪومتي ۽ ٻيا هلال احمر جي ذريعي عطيا ڏين. صدر چيو ته عالمي برادري ۽ هڪومت فراخدلي سان بلوچستان جي ٻوڏ متاثرين جي مدد ڪري، مستقبل ۾ ٻوڏ جي تباهين کان پاڻ کي بچائڻ، نقصان گهٽ ڪرڻ جي لاءِ قدمن جي ضرورت آهي. هن چيو ته بلوچستان ۾ ٻوڏ کان بچاءُ جي لاءِ ڊيمز جي تعمير ضروري آهي، برسات جي پاڻي کي محفوظ ڪري مستقبل ۾ زرعي مقصدن جي لاءِ استعمال ڪري سگهجي ٿو، موسمياتي تبديلين جي ڪري غيرمتوقع برساتن، ٻوڏ ۽ ڏڪار کي منهن ڏيڻو پئجي رهيو آهي. صدر چيو ته بلوچستان ۾ تمام گهڻيون برساتون ٿيون جڏهن ته ٻوڏ واري ريلي سان سخت نقصان پهتو، پٽ فيڊر ڪينال ۾ گهاري سان هيٺانهين وارن علائقن جي رهواسين، چوپائي مالي ۽ فصلن کي به سخت نقصان پهتو، جن خاندانن جو جاني نقصان ٿيو انهن کي حڪومت پاران وقت سر مالي امداد ادا ڪرڻ خوش آئنده آهي، بلوچستان ۾ مڪمل طور تي تباهه ٿيل گهرن جي ٻيهر تعمير جي لاءِ في گهر 5 لک رپيا ڏيڻ سان گهرن جي ٻيهر تعمير ۾ مدد ملندي. صدر ٻوڏ متاثرين جي بحالي لاءِ وفاقي ۽ صوبائي حڪومتن پاران ريليف جي اعلان کي ساراهيندي ٻوڏ متاثرين جي گهرن جي ٻيهر تعمير جي لاءِ پئڪيج خوش آئنده قرار ڏنو ۽ چيو ته بلوچستان حڪومت، عوام ۽ فوج ٻوڏ سٽيلن جي وقت سر مدد ڪرڻ تي ساراهه جي مستحق آهي. صدر کي بريفنگ ۾ ٻڌايو ويو ته بلوچستان ۾ 34 مان 32 ضلعن کي آفت سٽيل قرار ڏنو ويو آهي، جزوي طور تي تباهه ٿيندڙ گهرن جي تعمير جي لاءِ 2 لک رپيا في گهر ڏنا ويندا. نصيرآباد ضلعي ۾ هيستائين 4 هزار کان وڌيڪ راشن بيگ ۽ 2100 ٽينٽ ورهايا ويا آهن.
