اسلام آباد۔1فروری(اے پی پی):وفاقی کابینہ وزارت قومی صحت دی سفارش تے عالمی منڈی اچ خام مال دیاں ودھدیاں قیمتاں سانڳے 146 انتہائی ضروری جان بچاوݨ آلیاں دوایاں دیاں قیمتاں ودھاوݨ اتے مسابقتی کمیشن آف پاکستان اتے اسٹیٹ ایڈمنسٹریشن آف مارکیٹ ریگولیشن چین وچال مفاہمتی یادداشت تے دستخط دی منظوری ݙتی اے۔ نگران وزیراعظم انوار الحق کاکڑ دی اڳواݨی اچ نگران وفاقی کابینہ دا اجلاس تھئے۔ ݙسایا ڳئے جو مسابقتی کمیشن آف پاکستان اتے اسٹیٹ ایڈمنسٹریشن آف مارکیٹ ریگولیشن چین وچال مفاہمتی یادداشت تے دستخط نال ݙوہاں ملکاں وچال معلومات دے تبادلے اتے تکنیکی استعداد ودھسی۔ کابینہ پاکستانی ماہرِ نفسیات محمد سلیم خان ترین کیتے شعبہ نفسیات اچ خدمات سانڳے برطانیہ دے بادشاہ چارلس (سوئم) ولوں ممبر آف برٹش ایمپائر دا ایوارڈ وصول کرݨ دی اجازت ݙتی۔ کابینہ ائیر چیف مارشل ظہیر احمد بابر سدھو کوں اٹلی ولوں ݙتے گئے گولڈ میڈل فار ایروناٹیکل میرٹ ڳھنݨ دی وی منظوری ݙتی۔ وزارت قومی صحت اتے ڈریپ اجلاس کوں ݙسائے جو ڈریپ دے آن لائن پورٹل نال شہری مارکیٹ اچ ادویات نا ملݨ بارے شکایات درج کرا سڳدن۔ نگران وزیر اعظم شہریاں کوں دوایاں مناسب مل تے ݙیوݨ سانڳے اقدامات اتے اتے عام لوکاں کوں ودھ سوکھ ݙیوݨ دی ہدایت کیتی جو ڈرگ ریگولیٹری اتھارٹی آف پاکستان اپݨی کارکردگی ٻئی چنڳی کریندے ہوئے ادویات دی سمگلنگ اتے ذخیرہ اندوزی روکݨ کیتے ودھ اقدامات کیتے ونڄن، دوایاں دی قیمتاں ڈی ریگولیشن کرݨ سانڳے ضروری قانون سازی دی منسوبہ بندی کیتی ونڄے۔
