اسلام آباد۔6ستمبر(اے پی پی)نگراں وزیراعظم انوار الحق کاکڑ آکھیے جو ٹیکس نیٹ ودھاوݨ ترجیح اے، نقصان اچ ونڄݨ آلے سرکاری کارپوریشنز دی نجکاری قانون دے مطابق تیزی کیتی ونڄے۔ او اسلام آباد اچ فیڈرل بورڈ آف ریونیو اتے نجکاری ڈویژن دے اعلیٰ سطح اجلاس دی اڳواݨی کریندے پئے ہن۔ اجلاس اچ نگراں وفاقی وزیر خزانہ و محصولات ڈاکٹر شمشاد اختر، مشیر نگراں وزیراعظم احد چیمہ، وفاقی سیکرٹری خزانہ، وفاقی سیکرٹری ہوا بازی، وفاقی سیکرٹری نجکاری، چیئرمین ایف بی آر اتے ٻئے متعلقہ سرکاری افسران وی موجود ہن۔ اجلاس اچ فیڈرل بورڈ آف ریونیو اتے نجکاری ڈویژن دی کارکردگی تے تفصیلی بریفنگ ݙتی ڳئی۔ نگران وزیر اعظم ٹیکس اصلاحات کیتے سارے متعلقہ اداریاں کوں رل تے کم کرݨ دی ہدایت کریندے ٹیکس ڈاکومینٹیشن کیتے وفاق اتے صوبیاں وچال روابط تکڑے کرݨ تے زور ݙتے۔ ایف بی آر آکھیے جو ایں واری ٹیکس وصولی دا 9415 ارب روپے دا ہدف پورا کر ڳھدا ویسی، ٹیکس ٹو جی ڈی پی شرح ودھاوݨ کیتے ڈیجیٹل اقدامات کیتے ویندے پن، ایف بی آر ڈیٹا بیس باقی اداریاں نال جوڑیا ویندا پئے، 10 لکھ نویںے ٹیکس دہندگان کوں سسٹم اچ رلایا ویسی، پوائنٹ آف سیلز ودھاوݨ تے وی توجہ اے۔
