اسلام آباد۔31جولائی (اے پی پی) وزیر خزانہ مفتاح اسماعیل آکھیا جو اڄوکی حکومت سخت فیصلے کر تے ملک کوں دیوالیہ تھیوݨ توں بچائے۔ عمران خان ناقص پالیسیاں پاروں ایں نہج تے پڄیوں۔ سابق حکومت دی پالیسیاں پاروں تجارتی خسارہ ودھیا۔ حکومت ملکی برآمدات ودھاوݨ کیتے کم کریندی پئی اے۔ آݙت وار کوں پریس کانفرنس توں خطاب کریندیں ہوئیں وفاقی وزیر خزانہ مفتاح اسماعیل آکھیا جو ایں مہینے پنڄ بلین ڈالر دی برآمدات تھین، درآمدات اچ ڳھٹکی چنڳی ڳالھ اے۔ جون اچ 3.8 بلین دی پٹرولیم مصنوعات ڳھدن، درآمدات اچ ڳھٹکی پاروں روپے دی قدر مستحکم تھیندی پئی اے۔ کوشش کریندے پیوں جو مقامی صنعت کوں ودھاؤں۔ پچھلی حکومت ناقص پالیسیاں پاروں تجارتی خسارہ ودھیا۔ چار سالیں اچ 20 ہزار ارب قرضہ ڳھدا جئیں نال ملک دا معاشی نقصان تھیا۔
