اسلام آباد۔9اگست (اے پی پی) وفاقی وزیر ریلوے تے ہوابازی خواجہ سعد رفیق آکھیا جو ریلوے دے نظام کوں بہتر کرݨ کیتے تسلسل نال 20 سال چاہیدن اتے ریلوے کوں ترجیح ݙیوݨی پوسی۔ پوری دنیا دے ایئرپورٹس آؤٹ سورسنگ نال چلدے پئن۔ اسلام آباد انٹرنیشنل ائیرپورٹ دی کامیاب آئوٹ سورسنگ دے بعد لاہور اتے کراچی ائیرپورٹس آلے پاسے ویسوں۔ اسلام آباد اچ وفاقی وزیر ریلوے تے ہوابازی خواجہ سعد رفیق وزارت ریلوے اتے ہوابازی دے حکام دے رَلے گزریل پندراں مہینے دی کارکردگی تے میڈیا کوں بریفنگ ݙتی۔ انہاں آکھیا جو کہیں وی حکومت ریلوے تے اونویں توجہ نی ݙتی جینویں حق ہئی۔ ایم ایل ون 6.8 ارب ڈالر دا منصوبہ ہئی جیڑھا چھی سالیں اچ پورا تھیوݨا ہئی۔ گزریل دور حکومت اچ دیر پاروں اے منصوبے دی لاگت نو ارب ڈالر توں ودھ ڳئی اے۔
