اسلام آباد۔7اکتوبر (اے پی پی) پاکستان گزریل رات کراچی ایئرپورٹ دے نیڑے تھیوݨ آلے گھناؤنے دہشت گرد حملے دی مذمت کیتی جئیں اچ ݙو چینی انجینئرز دی جاناں دا ضیاع اتے ہک زخمی تھیا۔ ترجمان دفتر خارجہ توں سنوار کوں جاری بیان اچ آکھیا ڳئیا جو اساں چینی اتے پاکستانی متاثرین دے ٹبراں نال آپݨی تعزیت اتے ہمدردی اتے زخمیاں دی جلدی صحت یابی کیتے دعا کریندوں۔ بیان موجب دہشت گردی دی اے کاروائی نہ صرف پاکستان بلکہ پاکستان اتے چین دی دوستی تے وی حملہ اے۔ اساں مجید بریگیڈ سودھے ایں بزدلانہ حملے دے ذمہ وارں کوں انصاف دے کٹہرے اچ ڳھن آوݨ کیتے پرعزم ہیسے۔ ترجمان آپݨے بیان اچ ٻیا آکھیا جو پاکستان دے سکیورٹی اتے قانون نافذ کرݨ آلے ادارے مجرماں اتے انہاں دے سہولت کاراں کوں پکڑݨ اچ کوئی کسر نہ چھڑیسن۔ وزارت خارجہ کوآرڈینیشن کیتے چینی سفارت خانے نال رابطے اچ اے۔ ترجمان آکھیا جو پاکستان چینی شہریاں، منصوبے اتے پاکستان اچ اداریاں دی حفاظت اتے سلامتی کیتے آپݨا عزم کریندے اتے دہشت گرد قوتاں کوں شکست ݙیوݨ کیتے آپݨے چینی بھراواں نال رل تے کم کریندے رہسوں۔
