اسلام آباد۔6اکتوبر (اے پی پی):صدر مملکت ڈاکٹر عارف علوی آکھیے جو چھاتی دے کینسر دی وختی تشخیص تریمتاں اچ شرح اموات کوں گھٹ کرݨ کیتے اہم اے تے ایں بیماری بارے سماجی ممنوعات کوں ترک کرتے چیلنج نال نبݨݨ کیتے آبادی اچ شعور جڳاوݨ دی لوڑھ اے ، انہاں آپݨی ذال ثمینہ عارف علوی دے رلے ایوان صدر اچ پرنٹ تے الیکٹرانک میڈیا دے صحافیاں نال ھک ڳالھ مہاڑ اچ عوام کوں چھاتی دے کینسر بارے ݙساوݨ اچ میڈیا دے کردار دی اہمیت کوں اجاگر کیتے۔ صدر مملکت علاج معالجے دی بجائے احتیاطی تدابیر اپناوݨ تے زور ݙیندے ہوئیں آکھیے جو حکومت عوام دی سطح تے سکیننگ اتے آنکولوجی دے طریقہ کار سودھے مہانگے طبی علاج دے خرچے برداشت نی کرسڳدی ، انہاں آکھیے ایں بارے تریمتاں کوں تعلیم ݙیوݨ دی لوڑھ اے جو ایں مہلک مرض توں بچݨ کیتے از خود معائنہ کرݨ تے وختی طبی مدد حاصل کرݨ اچ ہچکچاہٹ محسوس نہ کرن۔
