اسلام آباد۔28جون (اے پی پی):وفاقی وزیر اطلاعات و نشریات چوہدری فواد حسین آکھیے جو پاکستان اچ 250 ملکی، 43 عالمی چینلز آزادانہ طورتے کم کریندے پئن ، حکومت اتے اپوزیشن اچ پاکستان دے مفادات تے اتفاق رائے ہووݨا چاہیدے، وزیراعظم عمران خان کوں ہر ادارے دی بنیاد توں ھک عمارت کھڑی کرݨی پوندی پئی اے ، اساں آپݨے اداریں کوں تکڑا کریسوں ، وزارت اطلاعات و نشریات کوں پوری دنیا اچ پاکستان دے بیانیہ دے ودھارے دے قابل بݨیسوں، ماضی اچ وزارت اطلاعات دے ماتحت اداریں اچ سیاسی بنیاداں تے بھرتیاں نال انہاں کوں تباہ کیتا ڳئے ، پی ٹی وی، اے پی پی اتے ریڈیو پاکستان کوں اگست تئیں جدید خطوط تے استوار کریندے پیوں ، اساں پی ٹی وی کوں حکمران جماعت دی بجائے ریاست دا ترجمان بݨائے ۔ سنوار کوں قومی اسمبلی اچ وفاقی وزیر چوہدری فواد حسین وزارت اطلاعات و نشریات دی کٹوتی دیاں تحریکاں تے بحث سنبھیندے ہوئیں آکھیے جو او ارکان دا شکریہ ادا کریندن جنہاں بحث اچ اہم امور چاتے ۔ وزیر اطلاعات آکھیے جو ایکسٹرنل پبلیسٹی ونگ دی ڳال کیتی ڳئی، اے درست ہے جو ونگ دی کارکردگی سوالیہ نشان اے لیکن ݙیکھݨا اے ہے جو ایندی وجہ کیا اے ۔ انہاں آکھیے اساں دہشتگردی دے خلاف جنگ لڑی، میں ایں ونگ توں پچھیے جو کیا مغرب اچ اساݙے بیانیہ دے حوالے نال کوئی کتاب لکھی ڳئی، عالمی سطح تے کوئی ایجھی فلم بݨائی ڳئی جیں اچ اساݙا نکتہ نظر واضح ہووے، ایندا جواب نفی اچ ہئی ، ایندے توں انڄ عالمی اخبارات اتے انٹرنیشنل میڈیا تے پاکستان دے بیانیہ دی تشہیر دے حوالے نال وی بیان نفی اچ ہئی ۔ انہاں آکھیے جو ایندی ھک وجہ اے وی ھے جو پاکستان دے ایکسٹرنل پبلسٹی ونگ دا سالانہ بجٹ ساڈھے چار کروڑ روپے جݙاں جو ایندے مقابلے اچ ہندوستان دا بجٹ 21کروڑ روپے ہے۔ انہاں آکھیے جو ہݨیں ہی جیڑھی انفولیب وٹھی ڳئی اتھاں 845 توں ودھ نقلی ویب سائٹس پاکستان دے خلاف مسلسل پروپیگنڈہ کریندیاں پیاں ہن۔ عالمی میڈیا کوں پاکستان بارے کوڑیاں خبراں ݙتیاں ویندیاں پیاں ہن ۔ کشمیریاں دی حق خودارادیت دی جدوجہد تے سوال چاتے ویندے پئے ہن ،بلوچستان اچ سب نیشنل ازم کوں ودھارا ݙتا ویندا پیا ہئی ، تحریک لبیک پاکستان دے احتجاج دے دوران الہ آباد توں 3 لکھ ٹویٹ کیتے ڳئن ایں توں اندازہ لاتا ونڄ سڳدے جو پاکستان دے خلاف کیں قسم دی جنگ لڑی ویندی پئی اے ، انہاں آکھیے میں ایں ڳال توں اتفاق کرینداں جو وجودہ دور ” وار آف اوپنین ” اے۔ اے اصل جنگ اے اتے اے پاکستان دی جنگ اے۔ انہاں آکھیے ݙوجھی ڳال اے ہے جو اساں اتھاں تئیں کیوں پڄے ، پچھلی حکومتاں مسلسل وزارت اطلاعات و نشریات دے اداریں اچ اپݨے کارکناں کوں بھرتی کیتے، صرف پی ٹی وی دے اندر 2200 ملازمین ݙاہ سالاں اچ بھرتی کیتے ، انہاں کوں پہلے ڈیلی ویجز تے بھرتی کیتا ڳئے جݙاں جو بعد اچ ھک کمیٹی بݨا تے انہاں کوں مستقل کرݙتا ڳئے ۔ انہاں دیاں تنخواہواں دا بجٹ 32 کروڑ روپے اے، انہاں بھرتی کیتے ڳئے لوکاں اچ 5 فیصد وی کم کرݨ آلے کائنی ، پی ٹی وی دا بھٹہ ٻلھا ݙتا ڳیا تے اینویں ایسوسی ایٹڈ پریس آف پاکستان دا ادارہ وی پورا ٻہہ ڳئے انہاں آکھیے جو اساں کیتے وی اے سوکھا اے جو اساں آپݨے حلقیں دے ھک ھک پولنگ سٹیشن توں ݙاہ ݙاہ لوک انہاں اداریاں اچ بھرتی کروں تے ول الیکشن جت ونڄوں۔ ریلوے تے سٹیل ملز دا بیڑہ غرق کیتا ڳئے ۔ انہاں آکھیے جو وزیراعظم عمران خان کوں ہر ادارے دی بنیاد توں ایندی نویں عمارت کھڑی کرݨی پوندی پئی اے ۔ اساکوں اے تباہ حال ادارے ورثے اچ ملئن اساں انہاں اداریں کوں تکڑا کرݨا اے ۔ انہاں آکھیے جو وزیرخزانہ دے شکرگزار ہیسے جو ایں ضمن اچ انہاں تعاون کیتے ۔
