لاہور۔15دسمبر(اے پی پی) صدر مملکت ڈاکٹر عارف علوی آکھیے جو سرکاری افسرعوام دی خدمت کرݨ اچ کوئی کسر باقی نہ چھوڑن ، ٹیم ورک نال اساں کہیں کم کوں چنڳے طریقے نال کر سڳدوں ، اساں جمہوریت سانڳے ٻہوں جدوجہد کیتی اے ۔ اے ڳالھ انہاں سول سروسز اکیڈمی اچ سپیشلائزڈ ٹریننگ پروگرام دے تحت تربیت مکمل کرݨ آلے پاکستان ایڈمنسٹریٹو سروس دے 46 افسراں اچ ایوارڈز تے سنداں ݙیوݨ دی تقریب توں خطاب اچ آکھی اے ۔ ایں موقع تے سول سروسز اکیڈمی دے ڈائریکٹر جنرل فرحان عزیز خواجہ وی موجود ہن ،تربیت مکمل کرݨ آلیں اچ پنجاب،سندھ اتے بلوچستان سودھے سارے صوبیں دے افسر شامل ہن ۔تقریب توں خطاب کریندے ہوئیں صدر مملکت ڈاکٹر عارف علوی آکھیے جو ایڈمنسٹریٹو افسراں کوں انسانیت دی خدمت کرݨ سکھایا ویندے ،ایڈمنسٹرٹیو افسراں کوں شیروانی اچ ݙیکھ تے خوشی تھئی اے تساں خود کوں منظم کرو تے خوشی دا کوئی لمحہ ہتھوں ونڄݨ نہ ݙیو،تساں خوش ہوسو تاں تسادا خاندان وی خوش ہوسی ۔ انہاں تربیت مکمل کرݨ آلے افسراں کیتے نیک خواہشات دا اظہارکریندے ہوئیں انہاں کوں آکھیے او لوکاں کیتے سوکھ پیدا کرن اڄ دا ݙینھ تربیت مکمل کرݨ آلے افسراں سانڳے ھک عظیم ݙینھ دی حیثیت رکھیندے ، جیڑھا انہاں کوں پوری زندگی یاد رہ ویسی ۔تقریب اچ صدر مملکت دوران تربیت چنڳی کارکردگی ݙکھاوݨ آلے افسراں اچ شیلڈ ݙتیاں ،بہترین سپورٹس پرسن دا ایوارڈ آفتاب منیرتے تریمتاں اچ ایمان ظفر،بہترین ہارس رائیڈر دا ایوارڈ کیپٹن ریٹائرڈ فرید بادینی،بہترین کنڈکٹ دا ایوارڈ سنبل جاوید جݙاں جو بہترین اکیڈمک دا ایوارڈ احسن نواز گوندل کوں ݙتا ڳئے ۔نصابی و غیر نصابی سرگرمیاں اچ بہترین کارکردگی ݙکھاوݨ تے سلمان یوسف کوں گولڈ میڈل نال نوازیا ڳئے۔
