اسلام آباد۔15مارچ (اے پی پی):وزیر خارجہ مخدوم شاہ محمود قریشی منڳل کوں ملائیشیا تے انڈونیشیا دے اپݨے ہم منصباں دے نال ٹیلیفونک رابطہ کیتے ۔ترجمان دفتر خارجہ موجب ڳالھ مہاڑ اچ ݙو طرفہ تعلقات اتے کثیرالجہتی شعبہ جات اچ ݙو طرفہ تعاون دے ودھارے سودھے سانجھی دلچسپی دے امور تے ڳالھ مہاڑ کیتی ڳئی ملائشین ہم منصب سیف الدین عبداللہ نال ڳالھ مہاڑ کریندے ہوئیں وزیر خارجہ آکھیے جو پاکستان اتے ملائشیا وچال گھاٹے برادرانہ تعلقات ہن۔اعلی سطحی رابطے دے ودھرے توں ݙوہیں ملکاں وچال ݙو طرفہ تعلقات مزید مستحکم تھئن۔شاہ محمود قریشی آکھیے جو بین الاقوامی فورمز تے پاکستان اتے ملائیشیا دے درمیان نقطہ نظر اچ ہم آہنگی، ݙو طرفہ تعلقات دے استحکام دا مظہر اے،۔وزیر خارجہ ݙوہیں ملکاں وچال پارلیمانی رابطے دے ودھارے تے پارلیمانی وفد دے تبادلیں دی لوڑھ تے زور ݙتے ۔وزیر خارجہ ملایشین ہم منصب کوں اسلام آباد اچ منعقدہ، او آئی سی وزراء خارجہ کونسل دے 48 ویں اجلاس اچ شرکت دی دعوت دا اعادہ کیتے۔ جمہوریہ انڈونیشیا دی وزیر خارجہ ریٹنو مرسودی دے نال ٹیلی فونک رابطہ دے دوران ݙوہیں وزراء خارجہ سانجھی دلچسپی دے وسیع موضوعات تے ڳالھ کیتی ، انہاں سیاسی، تجارتی اتے اقتصادی معاملات دے نال نال اقوام متحدہ، آسیان، او آئی سی اتے ٻئے کثیر الجہتی فورمز تے تعاون کوں مزید مضبوط بݨاوݨ تے اتفاق کیتے۔ݙوہیں وزراء خارجہ ݙوطرفہ اتے کثیر جہتی، مشترکہ مفاد دے امور تے تعاون جاری رکھݨ تے اتفاق کیتے ۔ انڈونیشیا دی وزیر خارجہ وزیر خارجہ مخدوم شاہ محمود قریشی کوں انڈونیشیا دے دورے دی دعوت ݙتی ۔دعوت قبول کریندے ہوئیں وزیر خارجہ سانجھے طور تے مناسب تاریخ تے انڈونیشیا دا دورہ کرݨ دا عندیہ ݙتا۔
