اسلام آباد -04 اپريل (اي پي پي) ايشيائي ترقياتي بئنڪ (اي ڊي بي) چيو آهي، ته پاڪستان جي معيشت کي لڳاتار ڏکيائين کي منهن ڏيڻو پئجي رهيو آهي، جڏهن ته مضبوط ملڪي معيشت ۽ ڍانچي وار سڌارن سان پاڪستان جي معيشت ۾ ٻيهر اڀرڻ جي صلاحيت موجود آهي. اها ڳالهه بئنڪ طرفان جاري ڪيل ايشين ڊولپمينٽ آئوٽ لڪ اپريل 2023ع جي فليگ شپ اقتصادي رپورٽ ۾ چئي ويئي آهي. پاڪستان ۾ ايشيائي ترقياتي بئنڪ جي ڪنٽري ڊائريڪٽر ينگ يي ٻڌايو آهي ته پاڪستاني معيشت کي لڳاتار ڏکيائيون درپيش آهن ۽ گذريل سال جي تباهه ڪندڙ ٻوڏ معاشي مالياتي چئلينجن کي وڌيڪ وڌايو آهي. هن چيو ته انهن ڏکيائين باوجود مضبوط ميڪرو اڪنامڪ ۽ ڍانچي وار سڌارن سان پاڪستان جي معيشت اڀري سگهي ٿي. رپورٽ ۾ ٻڌايو ويو آهي ته گذريل سال جي تباه ڪن ٻوڏ سبب وڌندڙ مهانگائي، ڪرنٽ اڪائونٽ خساري ۽ ناڻي جي ذخيرن جي بحران جي تناظر ۾ مالي سال 2023ع ۾ ملڪي اقتصادي ترقي جي رفتار سست رهڻ جو امڪان آهي. رپورٽ ۾ ٻڌايو ويو ته جاري مالي سال ۾ ملڪ جي اقتصادي اوسر جي شرح 0.6 سيڪڙو ۽ ايندڙ سال ۾ 2 سيڪڙو رهڻ جو امڪان آهي. رپورٽ ۾ ٻڌايو ويو ته مالي سال 2023ع ۾ مالي خسارو جي ڊي پي جي 6.9 سيڪڙو رهڻ جو امڪان آهي. عالمي مالياتي فنڊ جو پروگرام جاري رهڻ سان خساري م گهٽتائي ايندي.
.jpg)