اسلام آباد – 14 ڊسمبر (اي پي پي) وفاقي ڪابينا انساني همدردي جي بنياد تي افغان رهواسين جي لاءِ پاڪستاني ويزا حاصل ڪرڻ جي طريقيڪار ۾ وڌيڪ آساني جي اجازت ڏئي ڇڏي آهي، ان فيصلي کانپوءِ ويزا حاصل ڪرڻ جي لاءِ گهربل ڪليئرنس جو مدو 30 ڏينهن کان گهٽ ڪري 15 ڏينهن ڪيو ويو آهي، افغان عوام جي ڀلائي ۽ امداد جي لاءِ ڪم ڪندڙ عالمي اين جي اوز جي رجسٽريشن جي طريقيڪار کي آسان بڻائڻ جو پڻ فيصلو ڪيو ويو آهي. وزيراعظم ميڊيا آفيس پاران جاري پڌرنامي موجب وزيراعظم عمران خان جي صدارت ۾ وفاقي ڪابينا جو اجلاس ٿيو. اجلاس ۾ خاص معاون ڊاڪٽر فيصل سلطان ڪورونا جي نئين قسم اومي ڪرون جي ڏس ۾ حفاظتي قدمن جي حوالي سان بريفنگ ڏني. ڪابينا ويڪسي نيشن وڌائڻ، سماجي فاصلو برقرار رکڻ ۽ ماسڪ پائڻ جي ضرورت تي زور ڏنو. ڪابينا کي آگاهه ڪيو ويو ته هن وقت پاڪستان ۾ 2 ڪروڙ ماڻهن ڪورونا ويڪسين جي ٻي ڊوز ناهي لڳرائي. ڪابينا اپيل ڪئي ته اهي سمورا ماڻهو جلد کان جلد ٻي ڊوز لڳرائين ته جيئن ڪورونا جي ڦهلاءُ کي روڪي سگهجي. ويڪسين جي ٻي ڊوز لڳرائڻ کانپوءِ قوت مدافعت ۾ 17 ڀيرا وڌيڪ اضافو ٿئي ٿو. وزيراعظم وفاقي وزيرن اسد عمر ۽ زبيده جلال کي جلد گوادر جو دورو ڪرڻ جي هدايت ڪئي ته جيئن گوادر جي عوام جي مسئلن جي جلد حل لاءِ سفارشون جوڙي سگهجن. اجلاس ۾ اليڪٽرانڪ ووٽنگ مشين متعارف ڪرائڻ ۽ ٻاهرئين ملڪ پاڪستانين کي ووٽ جو اختيار ڏيڻ جي حوالي سان بريفنگ ڏني وئي. ڪابينا اسلام آباد ۾ ٿيندڙ بلدياتي چونڊن ۾ اليڪٽرانڪ ووٽنگ مشين جي استعمال جي اي سي پي جي فيصلي کي خوش آئنده قرار ڏنو. ڪابينا کي اليڪٽرانڪ ووٽنگ مشينن جي ملڪ جي سمورن پولنگ اسٽيشنن تائين پهچ ۽ استعمال ۽ عملي جي ٽريننگ جي حوالي سان شيڊيول تي تفصيلي بريفنگ ڏني وئي. ڪابينا اليڪٽرانڪ ووٽنگ مشين ۽ ٻاهرئين ملڪ پاڪستانين کي ووٽ جو اختيار ڏيڻ جا قانون لاڳو ٿيڻ کانپوءِ ايندڙ چونڊون اليڪٽرانڪ ووٽنگ مشينن سان منعقد ڪرائڻ جي عزم جو اظهار ڪيو. ناڻي واري صلاحڪار وفاقي ڪابينا کي ضرورت جي شين جي قيمتن جو تقابلي جائزو پيش ڪيو. هفتيوار مهانگائي جي شرح ۾ 0.07 سيڪڙو گهٽتائي آئي آهي. کنڊ، اٽو ۽ گهريلو استعمال جي شين جي قيمتن ۾ گهٽتائي رڪارڊ ٿي آهي. 9 شين جي قيمتن ۾ گهٽتائي آئي، 23 شين جي قيمتن ۾ استحڪام رهيو. ڪابينا کي آگاهه ڪيو ويو ته خطي ۾ گيهه ۽ چانهه جي پتيءَ جي قيمتن کانسواءِ ٻين گهريلو استعمال جي شين جون قيمتون پاڪستان ۾ گهٽ آهن. انهن شين ۾ اٽو، چڻا، دال ماش، دال مڱ، ٽماٽا، بصر، چڪن ۽ پيٽرول شامل آهن. سنڌ ۾ ضرورت جي شين بشمول اٽو، کنڊ، کير، گيهه ۽ دالين جي وڌيڪ قيمتن تي ڳڻتي جو اظهار ڪيو ويو. ڪابينا پاڪستان ۽ تاجڪستان جي وچ ۾ ٻطرفي فضائي روٽ ۾ تبديلي جي منظوري ڏني. ان فيصلي سان فضائي فاصلي ۽ سفري خرچن ۾ گهٽتائي ايندي. ڪابينا پاڪستان ۽ قازقستان جي وچ ۾ فضائي سفر جي شروعات جي لاءِ قازق ايئر ڪمپني کي پاڪستان ۾ ڪم ڪرڻ جي اجازت ڏني. ان فيصلي سان پاڪستان ۽ قازقستان جي وچ ۾ سڌوسنئون هوائي سفر ممڪن ٿيندو ۽ گڏيل واپار ۾ مدد ملندي. پاڪستان ۽ وچ ايشيائي ملڪن جي وچ ۾ واپار جي فروغ جي لاءِ ڪابينا هوابازي ڊويزن کي سمورن وچ ايشيائي ملڪن سان فضائي سفر جا معاهدا ڪرڻ جي حوالي سان ڪم شروع ڪرڻ جي هدايت ڪئي. ڪابينا پاڪستان ۽ عراق جي وچ ۾ فضائي سفر معاهدي ۾ ترميم جي اجازت ڏني. ان فيصلي سان پاڪستان ۽ عراق جي وچ ۾ ڪمرشل فلائيٽس ۾ اضافو ممڪن ٿيندو. ڪابينا پاڪستاني 10، 50، 100 ۽ 1000 جا پراڻا ڪرنسي نوٽ تبديل ڪرڻ جي مدي ۾ 31 ڊسمبر 2022ع تائين واڌ جي اجازت ڏني. ڪابينا کي آگاهه ڪيو ويو ته هن وقت ملڪ ۾ ڀاڻ جي ڪا کوٽ نه آهي جڏهن ته ملڪ ۾ ربيع فصل جي لاءِ يوريا ڀاڻ جي فراهمي يقيني بڻائڻ جي لاءِ هيٺ ڏنل منظوريون ڏنيون. سوئي ناردرن گئس ڪمپني يوريا پلانٽس کي جنوري 2022ع تائين گئس فراهم ڪندي، پاڪ عرب ۽ فاطمه فرٽيلائيزر پلانٽس کي گئس جي فراهمي کي يقيني بڻايو ويندو، اضافي 50000 ٽن يوريا درآمد ڪرڻ جي عمل کي تيزي سان مڪمل ڪيو وڃي. ياد رهي ته پاڪستان ۾ في ٻوري يوريا جي قيمت اٽڪل 1864 رپيا آهي جڏهن ته ٻين ملڪن ۾ في ٻوري 10000 رپين جي حساب سان وڪرو ٿي رهي آهي. موجوده حڪومت زراعت ۽ آبادگارن جي ترقي لاءِ سڀ کان وڌيڪ قدم کنيا. ڪابينا کي ملڪ ۾ کنڊ جي پيداوار ۽ قيمتن جي حوالي سان تفصيلي بريفنگ ڏني وئي. ڪابينا کنڊ جي موجوده اسٽاڪ ۽ قيمت تي اطمينان جو اظهار ڪيو. وزيراعظم هدايت ڪئي ته کنڊ جي اسٽريٽجڪ ذخيرن کي برقرار رکيو وڃي ته جيئن قيمتن ۾ استحڪام رهي. ڪابينا کنڊ سيڪٽر سڌارن جي حوالي سان قائم خصوصي ڪميٽي جي رپورٽ جون سفارشون عوامي راءِ جي لاءِ جاري ڪرڻ جي پڻ منظوري ڏني. انساني همدردي جي بنياد تي افغاني رهواسين جي لاءِ پاڪستاني ويزا حاصل ڪرڻ جي طريقيڪار ۾ وڌيڪ آساني جي اجازت ڏني وئي. ان فيصلي کانپوءِ ويزا حاصل ڪرڻ جي لاءِ گهربل سيڪيورٽي ڪليئرنس جو مدو 30 ڏينهن کان گهٽ ڪري 15 ڏينهن ڪيو ويو آهي. افغان عوام جي ڀلائي ۽ امداد جي لاءِم ڪم ڪندڙ عالمي اين جي اوز جي رجسٽريشن جي طريقيڪار کي آسان بڻائن جو فيصلو ڪيو ويو. اهو فيصلو انساني همدردي ۽ افغانستان جي عوام کي امداد جي فراهمي جي ڏس م ڪيو ويو آهي. پاڪستان جي رستي ٻين ملڪن ۾ لڏپلاڻ ڪندڙ افغانين جي لاءِ ڏنل سهولتن جي لاءِ وڌيڪ 60 ڏينهن جي واڌ ڪئي وئي. ان سهولت ۾ زميني ۽ فضائي رستن تان سفر شامل آهي. افغان عوام جي ڀلائي لاءِ ڪم ڪندڙ عالمي اين جي اوز جي اهلڪارن جي لاءِ پاڪستاني ويزا حاصل ڪرڻ جي طريقيڪار کي آسان (بنا سيڪيورٽي ڪليئرنس) بڻائڻ جو فيصلو ڪيو ويو. اهو فيصلو انساني همدردي ۽ افغانستان جي عوام کي امداد جي فراهمي جي ڏس ۾ ڪيو ويو آهي. ڪابينا کي اوگرا جي سالياني رپورٽ سال 20 – 2019ع پيش ڪئي وئي. ان رپورٽ ۾ پاڪستان جي پيٽروليم صنعت جي ڪارڪردگي، پيداوار، طلب ۽ پهچ ۽ پيٽروليم صنعت جي بهتري جي حوالي سان سفارشون ڏنيون ويون آهن. ڪابينا کي آگاهه ڪيو ويو ته هن وقت پيٽرول ۽ ڊيزل جو 27 ڏينهن جو اسٽاڪ موجود آهي. ايڪسپلوريشن 75 لائيسنسن جي مد ۾ 29 ارب رپين جي آمدني حاصل ٿي. ايل پي جي سلينڊرن جي سيفٽي معيار کي بهتر ڪيو پيو وڃي ۽ عوامي آگاهي مهم پڻ جاري آهي. ايل پي جي ڪمپنين کي 10 لائيسنس جاري ڪيا ويا، گئس چوري کي روڪڻ جي لاءِ آڊٽ ڪئي پئي وڃي، غيرقانوني پيٽرول پمس ۽ پلاسٽڪ جي ڪنٽينر ۾ پيٽرول وڪروڪندڙن جي خلاف ڪارروائي ڪئي پئي وڃي. ڪابينا اداراجاتي سڌارن بابت ڪميٽي جي 24 نومبر 2021ع تي ٿيندڙ اجلاس ۾ ڪيل فيصلن جي توثيق ڪئي جنهن موجب نيشنل ريسرچ انسٽيٽيوٽ فار فرٽيليٽي ڪيئر ڪراچي کي نيشنل انسٽيٽيوٽ آف پاپوليشن اسٽڊيز اسلام آباد ۾ ضم ڪيو ويندو. ڪابينا توانائي بابت ڪميٽي جي 20 ڊسمبر 2021ع تي ٿيندڙ اجلاس ۾ ڪيل فيصلن جي توثيق ڪئي. ڪابينا اقتصادي رابطا ڪميٽي (اي سي سي) جي 10 ڊسمبر 2021ع ي ٿيندڙ اجلاس ۾ ڪيل فيصلن جي توثيق ڪئي. اي سي سي جي اجلاس ۾ سمال ۽ ميڊيم انٽرپرائيزز پاليسي 25 – 2021ع، ڪمرشل گئس ايلوڪيشن فارم، ميسرز يونائيٽيڊ انرجي پاڪستان فيلڊز، لاهور ۽ سندر انڊسٽريل اسٽيٽ جي صنعتي صارفين جي لاءِ رعايتي ٽيرف جي لاءِ حڪمت عملي شامل آهي. ڪابينا سي پي پي پي اي جي چيف فنانشل آفيسر کي بطور سي اي او سينٽرل پاور پرچيزنگ ايجنسي جي اضافي چارج ڏيڻ جي منظوري ڏني. ڪابينا انساني همدردي جي بنياد تي افغانستان جي لاءِ اين ڊي ايم اي پاران امداد جي فراهمي جي اجازت ڏني. پاڪستان حڪومت اڳ ۾ ئي ورلڊ فوڊ پروگرام تحت 200000 ٽن ڪڻڪ ۽ پاڪستان پاران اضافي 50000 ٽن ڪڻڪ جي امداد افغان عوام جي لاءِ فراهم ڪري چڪو آهي.
