ڈیرہ اسماعیل خان۔27جنوری (اے پی پی):وزیراعظم دے معاون خصوصی صحت ڈاکٹر فیصل سلطان آکھیے جو حکومت پولیو مکاوݨ کیتے بھر پور اقدامات کیتے ویندے پئن ، گزریل سال پورے ملک اچ پولیو دا کوئی کیس سامݨے نی آیا، ساݙا مشن پولیو کوں منڈھوں مکاوݨا اے سارے طبقہ فکر دے لوکاں کوں آپݨی آپݨی کمیونٹی اچ پولیو جیہی مہلک بیماری بارے اچ لوکاں کوں ݙساوݨا اے ، دنیا کورونا دے مرض دے سدباب، ویکسین دے اقدامات، تدارک دے سلسلے اچ حیران اے۔قومی صحت کارڈ ساݙی حکومت دا تاریخی منصوبہ اے ،اے کارڈ صحت دے شعبے اچ انقلابی قدم اے۔ اے ڳال انہاں سرکٹ ہاوس ڈیرہ اچ پولیو کوں منڈھوں مکاوݨ دے سلسلے اچ ھک منعقدہ تقریب توں خطاب کریندے ہوئیں آکھی اے ، انہاں آکھیے جو اساکوں آپݨے ہیلتھ ورکرز، سکیورٹی فورسز تے بئے اداریں دیاں کوششاں تےپولیس دیاں قربانیاں، شہادتاں تے فخر اے۔ انہاں آکھیے جو بدقسمتی توں حالی تئیں ساݙے ماحول، نالاں، گندگی وغیرہ اچ پولیس دا وائرس موجود اے جݙاں جو دنیا دے فو ملکاں جنہاں اچ ساݙا ملک وی شامل اے ، پولیو دی بیماری موجود اے۔ انہاں آکھیے جو ساری محنت ضائع نہ تھیوے، اساں ساریں کوں رل تے پولیو دی بیماری کوں منڈھوں مکاوݨ کیتے آپݨے خاندان کوں آگاہی ݙیوݨی چاہیدی اے ۔
